Salander kemur til Íslands

Sænska leikkonan, Noomi Rapace, sem leikur tölvuþrjótinn Lisbeth Salander í kvikmyndinni Karlar sem hata konur, verður viðstödd frumsýningu myndarinnar þann 22. júlí í Smárabíói. Noomi, sem á íslenskan stjúpföður og er altalandi á íslensku, hyggst eyða nokkrum dögum hér á landi ásamt fjölskyldu, en með henni í för verða börnin hennar tvö og maðurinn hennar, leikarinn Ole Rapace, sem aðdáendur sjónvarpsþáttarins Önnu Pihl ættu að kannast við í hlutverki Daníels.

Noomi hefur ekki farið leynt með íslenska fortíð sína. Samkvæmt sænskum vefmiðlum bjó Noomi um stundarsakir á Flúðum ásamt móður sinni og afrekaði það meðal annars að leika lítið hlutverk í kvikmynd Hrafns Gunnlaugssonar, Í skugga hrafnsins.

Kvikmyndin Karlar sem hata konur er byggð á metsölubók Stieg Larsson en hún hefur selst í bílförmum á Norðurlöndunum. Ísland er þar engin undantekning. Lengi vel leit reyndar út fyrir að kvikmyndin yrði ekki sýnd í íslenskum kvikmyndahúsum en, sem betur fer, hafðist það fyrir horn. -fgg