Rauðari Fabúla á nýrri plötu

Ný plata með Fabúlu, In Your Skin, kemur út í lok október. „Platan var tekin upp niðri við höfn í Hafnarfirði í hljóðveri Rafnsbræðra, Error, við vængjaþyt og fiskiilm," segir Margrét Kristín Sigurðardóttir, Fabúla. „Platan dvelur meira við léttu hliðar lífsins frekar en þær angurværu eins og síðasta platan, Dusk, gerði. Dusk var blá, en þessi rauðari."

Plötuna tileinkar Margrét foreldrum sínum, þeim Jóhönnu G Möller og Sigurði Pálssyni. „Það er eitt lag til hvors þeirra á plötunni. „Ból mitt" heitir mömmu-lag og hefst inni í henni - en bólið hefur enn merkingu, því hjá henni er eilífur griðastaður. Ég ólst upp vestast í vesturbænum með móa, tjarnir, fjöru, torfæruhóla og öskuhauga sem leiksvæði. Dagarnir voru samfellt ævintýri og heima beið mamma brosandi með faðminn útbreiddan. Lagið er óður til hennar fyrir að vera þessi vermandi eldur, en eira samt svo lengi á sama stað."

Margrét segir „pabba-lagið" heita „í gegnum glerið" - „Við pabbi sáumst fyrst í gegnum gler. Mamma fékk blóðtappa í kjölfarið á fæðingunni, svo við mæðgurnar þurftum að vera nokkrar vikur á sjúkrahúsi. Í þá daga fengu feðurnir ekki að snerta börnin sín á fæðingardeildinni, aðeins að horfa á þau í gegnum gler. „Í gegnum glerið" fann ég fyrir hlýrri nærveru hins dökkhærða manns og fann að hjarta mitt var gróðursett í hjarta hans."

Næstkomandi þriðjudag heldur Fabúla „forútgáfutónleika" á Rósenberg og hefjast þeir klukkan 21. Með henni leika Birkir Rafn Gíslason á gítar, en hann vann nýju plötuna með Margréti, Jökull Jörgensen á bassa, Scott McLemore á trommur, Margrét Árnadóttir á selló og Unnur Birna Björnsdóttir á fiðlu. Fyrsta lagið af plötunni, „Monster", má nú heyra á myspace.com/fabulaband.

- drg