Þjóðlög á mynddiski

Það styttist í Þjóðlagahátíðina á Siglufirði sem haldin er í tíunda sinn en hún verður sett á miðvikudag. Í tilefni af afmælinu og aldar útgáfuafmælis þjóðlagasafns sr. Bjarna Þorsteinssonar gefur Þjóðlagasetrið á Siglufirði út stórglæsilegan mynddisk með upptökum sem setrið hefur gert á árunum 2005 til 2009. Alls koma fram á diskinum um 50 manns á öllum aldri og víðs vegar að af landinu. Þar á meðal eru 30 kvæðamenn og 20 manna dansflokkur sem sýnir íslenska þjóðdansa. Þá er leikið á langspil og íslenska fiðlu.

Á meðal flytjenda eru Steindór Andersen, Diddi fiðla, Bára Grímsdóttir, Ása Ketilsdóttir, Örn og Sigursveinn Magnússynir, Marta G. Halldórsdóttir og Njáll Sigurðsson. Danshópurinn Sporið sýnir bæði sagnadansa og vikivaka sem og „gömlu dansana“.

Stjórnandi útgáfunnar er Gunnsteinn Ólafsson tónlistarmaður en hann hefur safnað efninu ásamt Dúa J. Landmark kvikmyndagerðarmanni. Diskurinn er bæði á íslensku og ensku og kemur út 1. júlí við setningu Þjóðlagahátíðarinnar á Siglufirði.

Alls eru 94 mínútur af efni á disknum: rímnalög, barnagælur og þulur, fimmundasöngur, sálmar og svokallaðar druslur, gaman- og drykkjusöngvar, sagnadansar, vikivakar og „gömlu dansarnir“.

Sr. Bjarni Þorsteinsson (1861-1938) gaf út bók sína Íslensk þjóðlög á árunum 1906-1909. Hún er helsta ritaða heimild um sögu íslenskrar þjóðlagatónlistar sem til er. Sr. Bjarni safnaði saman lögum úr fornum handritum og bókum en langmerkust er söfnun hans á þjóðlögum úr munnlegri geymd. Einnig leitaði hann til fjölmargra annarra um allt land til þess að skrá lög upp eftir fólki. Sr. Bjarni var ekki aðeins þjóðlagasafnari.

Hann var frægt tónskáld á sinni tíð, prestur og mikill hugsjónamaður. Hann stjórnaði allri uppbyggingu á Siglufirði í nærri hálfa öld þegar síldin gerði bæinn að helsta útflutningsbæ landsins og er því af mörgum nefndur faðir Siglufjarðar. - pbb