Birkir Jón: Ætlum að standa undir væntingum fólks

,,Þetta eru viðbrögð almennings að Framsókn er að svara því kalli að breytinga er þörf í íslenskum stjórnmálum," segir Birkir Jón Jónsson, varaformaður Framsóknarflokksins, um gott gengi flokksins í skoðanakönnunum.

Stuðningur við Framsóknarflokksins rís hratt og segjast 16,8 prósent styðja flokkinn í nýrri skoðanakönnun Fréttablaðsins. Fylgið hefur ekki mælst meira í könnunum blaðsins í rúm fimm ár. Í könnun MMR sem birt var á fimmtudaginn mældist fylgi flokksins 17,2%

Birkir Jón segist vera ákaflega þakklátur fyrir aukinn stuðning almennings við flokkinn. Forysta og þingmenn flokksins ætli að standa undir þeim væntingum og kröfum sem til þeirra eru gerðar. ,,Krafan er ný vinnubrögð. Hvort sem er almennt í samfélaginu eða innan flokksins."

Varaformaðurinn segist hafa fundið fyrir miklum meðbyr í kjölfar flokksþings framsóknarmanna. ,,Mikið að nýju fólki hefur verið að ganga til liðs við flokkinn seinustu daga. Ég hef einnig fundið fyrir því að gamlir félagir sem studdu flokkinn eru að koma til baka."