Deilt um hvalveiðar í nýja meirihlutanum

Siv Friðleifsdóttir, formaður þingflokks framsóknarmanna, er ósátt við hugmyndir Steingríms J. Sigfússonar sjávarútvegsráðherra um að breyta ákvörðun fyrrverandi ráðherra um að heimila hvalveiðar.

Siv sagði í tíufréttum RÚV það vera mjög sérstakt ef ráðherrann ætlaði að skapa óvissu um þetta mál. Ætli hann að gera það vill Siv að fram komi afdráttarlaus afstaða þingsins, en hún telur að í þinginu sé afdráttarlaus stuðningur við hvalveiðar. Yrði óvissa um málið til lengri tíma gæti þingið komið með yfirlýsingu um þetta mál sem hún telur að ráðherrann yrði þá að fara eftir.

Eitt af síðustu verkefnum Einars K. Guðfinnssonar, fyrrverandi sjávarútvegsráðherra, var að gefa út leyfi til veiðar á hrefnu og langreyði til fimm ára. Hann sagði á fundi sjálfstæðismanna síðastliðinn föstudag að það yrði reginhneyksli ef nýr ráðherra myndi breyta ákvörðun sinni. Þar með væri hann að ganga gegn vilja Alþingis.