Fjármálaeftirlitið auglýsir eftir starfsfólki

Fjármálaeftirlitið auglýsir eftir starfsfólki í tímabundin störf. Samkvæmt upplýsingum frá Fjármálaeftirlitinu er um að ræða um það bil fimm störf. Fjöldi starfa fer þó eftir eftir umsóknum. Nú þegar hefur fjöldi umsókna borist.

Fjármálaeftirlitið fékk rétt fyrir jól 550 milljóna króna aukafjárveitingu til að bregðast við kostnaði við framkvæmd neyðarlaganna sem Alþingi setti í október.

Stofnunin leitar að einstaklingum í störf sérfræðinga, lögfræðinga og á sviði upplýsingatækni. Krafist er háskólamenntunar og viðeigandi starfsreynslu. Hjá Fjármálaeftirlitinu starfa rúmlega 60 manns.

Helstu verkefni sérfræðinga sem auglýst er eftir er aðkoma að rannsóknum á fjármálamarkaði og eftirlit með viðskiptaháttum á markaði. Með helstu verkefna lögfræðinganna er eftirlit með starfsháttum, starfsheimildum, fjárfestingum og skuldbindingum sem og aðkoma að rannsóknum á fjármálamarkaði.

Líkt og áður sagði er um að ræða tímabundin störf, eða til 31. desember 2009. Umsóknarfrestur rennur út 2. febrúar.