Gaf Færeyingum ævistarfið

„Það var bara mjög góð tilfinning að sjá á eftir þessu til þeirra,“ segir Magnús Magnússon kvikmyndagerðarmaður, sem gaf færeysku þjóðinni nær allt ævistarf sitt; það eru sextíu heimildarmyndir og þættir.

Þeirra á meðal er myndin „Í ríki fálkans“ sem var frumsýnd 3. maí síðastliðinn. „Ég var löngu búinn að ákveða að gefa þeim þetta. Svo þegar þeir stóðu með okkur í hremmingunum meðan aðrir litu undan varð ég ákveðinn í að nú þyrfti ég að láta verða af þessu. Svo hringdi ég í menntamálaráðherra þeirra og hún sagði bara já, takk.“

Efnið verður textað og svo sýnt í sjónvarpi. Þá nýtir Námsgagnastofnun efnið. Einnig verður það til sýnis á bókasöfnum, sjúkrahúsum og víðar.

Magnús fór með myndirnar í síðustu viku og notaði ferðina til að taka myndir af fuglum fyrir myndavef sem Námsgagnastofnunin hér lætur gera.

Færeyingar hafa nú fest kaup á þessum vef. „Ég held að þetta sé í fyrsta sinn sem námsgögn eru flutt út frá Íslandi,“ segir hann. Magnús á allar hreyfimyndirnar á vefnum og margar ljósmyndir en annars á Jóhann Óli Hilmarsson fuglafræðingur mestan heiðurinn að vefnum. - jse