Nánast samhljóma ávarp gjörólíkra borgarstjóra

„Þetta er eflaust eitthvað staðlað sem skrifstofa borgarstjóra hefur útbúið," segir Ólafur F. Magnússon fyrrverandi borgarstjóri.

Ólafur F. og Hanna Birna Kristjánsdóttir borgarstjóri hafa í gegnum tíðina ekki verið á sömu blaðsíðunni í pólitíkinni og oft tekist grimmilega á um málefni Reykjavíkurborgar.

En í Visitors Guide, veglegri handbók sem gefin er út árlega og ætluð er erlendum ferðamönnum, er að finna ávarp eða pistil frá borgarstjóra Reykjavíkur.

Svo einkennilega vill til að ávarp Hönnu Birnu er nánast það sama og ávarp Ólafs var í fyrra. Bæði velja þau sömu fyrirsögnina:

„Reykjavík - Be Inspired" og byrjunin er sú sama: „Think of the qualities of a great city - fun, space, clean air, nature, culture - and I feel that Reykjavik has them in spades." Glæsileg byrjun á pistli og magnað að þeim skyldi ekki einungis hafa dottið nákvæmlega hið sama í hug - heldur orðað það á sama hátt.

Ólafur kannast reyndar ekki við að hafa skrifað pistil í Visitors Guide þó í orði kveðnu sé það hann sem ávarpar lesandann og kvittar undir pistilinn. En þetta kemur honum ekki á óvart. Hann segir starf borgarstjóra 26 tíma starf á sólarhring. Þetta hafi án efa verið erindi sem embættismenn borgarinnar hafi afgreitt borgarstjóra til undirritunar að morgni annasams vinnudags. Og hann ekki einu sinni náð að lesa það yfir. Því ekki komi til greina að þau hafi sameinast um texta í eitt stykki ávarp.

„Ef þú heldur að til sé ólíkara fólk en við Hanna Birna þá skjöplast þér hrikalega. Ég hef komist að því að við erum af sitt hvoru sauðahúsinu." Ólafur gerir fastlega ráð fyrir því að ávarpið í Visitors Guide varði ekki póli-tíska stefnu.

Það er Netið, markaðs- og rekstrarráðgjöf, sem gefur Visitors Guide út. Útgefandi og ritstjóri er Hákon Þór Sindrason. Hann segir ávörp borgarstjóranna ekki eins þó svo virðist í fyrstu.

„Þegar við fengum þetta sent frá ráðhúsinu þá sýndist mér þetta vera sama ávarpið," segir Hákon Þór.jakob@frettabladid.is