Uppivöðsluseggir stöðva ekki þingstörf

„Hér varð skipulögð aðför að þinghúsinu," sagði Sturla Böðvarsson, forseti Alþingis, undir kvöld í gær þegar mótmælendum við húsið hafði snarfækkað frá því sem var fyrr um daginn. „Ég harma þetta og vona að til þessa þurfi ekki að koma aftur. Þingmönnum gengur ekki annað til en að vinna að þeim málum í þjóðarþágu."

Þingmenn Vinstri grænna lögðu til að þingfundi yrði slitið enda töldu þeir hvorki efni né aðstæður til að halda fundinum áfram. Þingmál á dagskrá snertu ástandið í samfélaginu lítið sem ekkert. Sturla segir ekki hafa komið til greina að slíta fundi, allra síst á á forsendum VG. Ágæt mál hafi verið á dagskrá, meðal annars frumvarp Kristins H. Gunnarssonar um breytingar á stjórnskipunarlögum. „Ég taldi engar forsendur, þrátt fyrir ólæti fyrir utan hús, að stöðva framvinduna. Til hvers?" sagði Sturla.

Átökin voru með þeim hætti að lögregla þurfti að beita piparúða, taka þurfti mótmælendur fasta, færa þá inn í þinghúsið og geyma þá í bílageymslu þinghússins. Á meðan heldur þingfundur áfram eins og ekkert hafi í skorist. Gengur þetta?

„Gengur það að ganga svona fram gagnvart þinginu, spyr ég. Ég svara því nei," segir Sturla. „Og við eigum ekki að láta fólk sem gengur með þessum hætti fram gagnvart þjóðþinginu að ráða för í samfélaginu. Við eigum auðvitað að hlusta á mótmælendur og við gerum það en við látum ekki stöðva störf löggjafarsamkomunnar vegna þess að uppivöðsluleggir láta öllum illum látum. Að sjálfsögðu hlustum við á þá sem mótmæla með eðlilegum hætti en ofbeldi á ekki að líðast í samfélaginu."

Sturla segir alla verða að leggjast á eitt svo ró og friður skapist í samfélaginu. Verið sé að leita allra leiða til að ráða bug á vandanum og til þess þurfi frið. Ekki síst í þinghúsinu. „Alþingi, elsta löggjafarsamkoma veraldar, verður að halda reisn sinni og hafa frið til að vinna að lausn mála."- bþs