Aftur boðið í réttinn á enska boltann

„Ég vænti þess að nýtt útboð fyrir enska boltann fari í gang fljótlega, og við munum taka þátt í því. Við gerum okkur vonir um að halda sýningarréttinum á þessu vinsæla efni áfram, en á viðráðanlegum kjörum," segir Ari Edwald, forstjóri 365.

Fyrirtækið tryggði sér sýningarréttinn á enska boltanum til þriggja ára frá haustinu 2007. Að sögn Ara gerðu aðstæðurnar sem upp komu við bankahrunið og fall krónunnar það að verkum að þess var farið á leit við umboðsaðila efnisins í Bretlandi að sá samningur yrði styttur um eitt ár. Hann gerir ráð fyrir að nýtt útboð, sem gildi til fjögurra ára, verði klárað á næstu mánuðum.

„Við erum mjög sátt við þá niðurstöðu. Það hafði verið boðið hátt í enska boltann, meðal annars á grundvelli kostunar sem samið var um í íslenskum krónum, þannig að þegar verðið á sýningarréttinum tvöfaldaðist gerði það okkur erfitt fyrir," segir Ari. Hann gerir ráð fyrir að verðið muni lækka til muna í næsta útboði.

Sigríður Margrét Oddsdóttir, framkvæmdastjóri Skjásins, segir fyrirtæki sitt fylgjast grannt með þróun þessara mála. „Við höfum ekki tekið afstöðu til þess hvort við hyggjumst bjóða í réttinn. Fyrst þurfum við að skoða öll útboðsgögn," segir Sigríður.

Páll Magnússon útvarpsstjóri segir RÚV ekki ætla að taka þátt í útboðinu. „Við höfum þá stefnu að fylgja íslenska landsliðinu í alþjóðlegum keppnum, en höfum dregið okkur út úr uppboðum á íþróttaviðburðum sem reknir eru á hreinum viðskiptalegum grundvelli. Við þær aðstæður sem nú ríkja sé ég alls enga ástæðu til að víkja frá þeirri stefnu," segir Páll Magnús­son.