Verulegur verðmunur á tannlæknaþjónustu

Verulegur verðmunur er á tannlæknaþjónustu fyrir börn á aldrinum 8-12 ára. Þetta sýnir könnun sem Neytendasamtökin gerðu. Þar kemur til dæmis fram að hæsta verð á svokölluðu áfangaeftirlit er tæpar 4200 krónur en lægsta verð 1000 krónur. Hæsta verð á viðgerð á einum fleti, eins og það er kallað, er 13.450 krónur en lægsta verð 2000 krónur.

Könnunin var gerð þannig að Neytendasamtökin sendu öllum starfandi tannlæknum bréf þann 15. apríl síðastliðinn ásamt eyðublaði þar sem þeir voru beðnir um að fylla út verð fyrir 19 aðgerðarliði. Svör bárust frá 106 tannlæknum sem er innan helmingur starfandi tannlækna. Þá kemur fram að tannlæknar hafi gert ýmsa fyrirvara varðandi verðskrá en það sé mat Neytendasamtakanna að könnunin auðveldi neytendum að átta sig á verðlagi hjá tannlæknum.

Tannlæknaþjónusta hefur verið töluvert í umræðunni að undanförnu enda eru vísbendingar um að tannheilsu barna hafi hrakað verulega á liðnum árum. Heilbrigðisráðherra skoðar nú hvort unnt sé að taka upp svokallaðan sykurskatt, sem myndi leggjast til dæmis á gosdrykki.