Tugir hjóna að falla á tíma

Íslensk ættleiðing og Foreldrafélag ættleiddra barna hafa lagt til við dómsmálaráðherra að aldurshámark verði fellt úr reglugerð um ættleiðingar og miðað verði við aldurshámark upprunaríkisins, segir í nýju fréttariti Íslenskrar ættleiðingar.

Eins og staðan er í dag eru tugir íslenskra hjóna sem vilja ættleiða barn að falla á tíma vegna innlends aldurshámarks. Núverandi hámark er 45 ár, en er í flestum löndum hærra. Nokkur ár getur tekið að bíða eftir að ættleiðing barns gangi í gegn og ef það gerist ekki fyrir 45 ára aldur missa hjónin möguleikann á ættleiðingu.

Ísland er þekkt fyrir góðar lífslíkur og háan meðalaldur og því ætti aldur ekki að vera svo mikil fyrirstaða, segir í ritinu.

„Með nýjum ráðherra skynjum við aukinn áhuga í dómsmálaráðuneytinu á ættleiðingarmálum. Við bindum því miklar vonir við að á þeim bæ verði skilningur á vanda þeirra sem eru að missa möguleika sína vegna þröngra aldursmarka á Íslandi,“ segir í ritinu.- hds