Ríkisstjórnin mun dæla fjármagni í atvinnuleysisbætur

Ríkisstjórnin er viðbúin því að setja inn aukið fjármagn í atvinnuleysistryggingarsjóð, en hann mun að óbreyttu tæmast á árinu. Forsætisráðherrra segir engan þurfa að óttast það að ekki verði hægt að greiða út atvinnuleysisbætur.

Atvinnuleysi hefur aukist hratt síðustu mánuði og eru nú tæplega fjórtán þúsund manns án atvinnu samkvæmt vef Vinnumálastofnunar. Þeir sem sækja um atvinnuleysisbætur fá þær greiddar út úr atvinnuleysistryggingasjóði. Sjóðurinn er fjármagnaður þannig að þegar atvinnurekandi greiðir launatengd gjöld fer hluti af þeim í atvinnuleysistryggingarsjóð. Þetta fyrirkomulag hefur verið haft síðan árið 1993 og frá þeim tíma hefur sjóðurinn aldrei tæmst.

Talið er að sjóðurinn hafi úr um tuttugu milljörðum króna að spila á þessu ári. Búist er við því að ef fram heldur sem horfir þurfi hann að greiða út meira í bætur á árinu og sjóðurinn tæmist því fyrir lok ársins.

Jóhanna Sigurðardóttir forsætisráðherra og fyrrverandi félags- og tryggingarmálaráðherra segir stjórnvöld þegar vera farin að huga að því hvernig brugðist verði við ef sjóðurinn tæmist. Ríkisstjórnin sé viðbúin því að setja inn aukið fjármagn í atvinnuleysistryggingarsjóð ef hann tæmist á árinu. Jóhanna segir engan þurfa að óttast það að ekki verði hægt að greiða út atvinnuleysisbætur, það verði gert þrátt fyrir tóman sjóð.