Ingibjörg vill ekkert fullyrða um stjórnarsamstarf fram að kosningum

Það þarf að skoða hvort núverandi ríkisstjórn starfar áfram fram á vor, sagði Ingibjörg Sólrún Gísladóttir utanríkisráðherra í samtali við fjölmiðla í Leifsstöð.

Hún var þá nýkomin frá Svíþjóð þar sem hún gekkst undir læknismeðferð. Hún sagðist ekki geta verið með neinar yfirlýsingar um það að svo stöddu hvernig stjórnarsamstarfið yrði fram að kosningum. Þá sagði Ingibjörg að hún stefndi að því að leiða Samfylkinguna í næstu kosningum.

Loks sagði Ingibjörg að hún væri slegin yfir tíðindum varðandi Geir. Það væri ótrúlega sérstakt að formenn tveggja stjórnarflokka í einni ríkisstjórn væru báðir að glíma við erfið veikindi. Ingibjörg sagði hins vegar að betur horfði með heilsu hennar eftir meðferðina í Svíþjóð.