„Það þarf að hreinsa til eftir partýið“

Jón Magnússon þingflokksformaður Frjálslyndaflokksins segir að ein af ástæðum þess að þingfundi var frestað í dag sé vegna tiltektar. „Það þarf að hreinsa hérna til eftir partýið," segir Jón sem var með tvö mál á dagskrá í dag.

„Síðan þarf náttúrulega að skoða hlutina það gengur ekki að þingið sé í hers höndum," segir Jón en tvær utandagskrárumræður áttu að fara fram á þingi í dag.

„Önnur snýr að atvinnumálum og það var ákveðið að hafa þá umræðu ítarlegri þar sem forsætisráðherra mun gefa skýrslu til þingsins um stöðu mála en stjórnarandstaðan gerði kröfu um það. Það var ekki mjög þung dagskrá á þingi í dag þannig að það er kannski ekki mikið að fresta," segir Jón sem þó þarf að fresta tóbakinu sínu eins og hann segir.

„Það snýst um að viðurkenna að fólk megi reykja innandyra."

Þingfundur hefur verið boðaður klukkan hálf ellefu í fyrramálið.