Ólögmæt ákvörðun ráðherra

Helgi Magnússon, formaður Samtaka iðnaðarins, er allt annað en sáttur með fjármála- og umhverfisráðherra. Hann segir að nýlegur úrskurður þess síðarnefnda um Suðvesturlínu væri ólögmæt ákvörðun. Helgi var gestur Sigurjóns M. Egilssonar á Bylgjunni í morgun.

Ákvarðanir sem hafa verið teknar að undanförnu trufla starfsemi fyrirtækja í iðnaði, að sögn Helga. Hann gagnrýndi úrskurð Svandísar Svavarsdóttur, umhverfisráðherra, um Suðvesturlínu.

„Þetta er ólögmæt ákvörðun og hún er að trufla verulega iðnaðaruppbyggingu á Suðurnesjum. Hún er ekki einungis að trufla uppbyggingu álvers í Helguvík heldur er einnig verið að koma upp gagnaveri á Keflavíkurflugvelli. Það er því margt annað sem hangir á þessari spýtu," sagði Helgi.

Helgi gagnrýndi einnig fyrirhugaðan orkuskatt sem boðaður er í fjárlagafrumvarpinu sem Steingrímur J. Sigfússon, fjármálaráðherra, lagði nýverið fram. Helgi sagði að hugmyndin um orkuskatt trufla alla hugsun, uppbyggingu og áætlunargerð iðnaðarfyrirtækja. „Þetta hefur ekki bara áhrif á stóriðju og álverin, eins og sumir vilja beina umræðunni að, heldur meira og minna allan iðnað."

Helgi aðgerðir stjórnvalda skemma orðspor Íslands. Blekið væri varla þornað á fjárfestingarsamningum þegar stjórnvöld væru farin að svíkja gefin fyrirheit. „Ef að Íslendingar fá á sig það orðspor að það sé ekki hægt að treysta samningum sem eru gerðir við stjórnvöld þá erum við í mjög vondum málum ofan á allt annað sem við erum fást við.“