Þórður biðst afsökunar á agabrotunum

Þórður Þorgeirsson, sem rekinn var úr íslenska landsliðinu í hestaíþróttum, hefur sent frá sér opinbera afsökunarbeiðni. Þórður var rekinn úr íslenska landsliðinu vegna agabrota.

Um helgina lauk heimsmeistaramóti íslenska hestsins í Brunnadern í Sviss. Þórður átti þar að sýna stóðhestinn Kjarna frá Auðsholtshjáleigu en vegna agabrota hans þurfti knapinn Sigurður Matthíasson að klára það verkefni eftir að Þórði hafði verið vikið úr landsliðinu. Þórður vildi ekki tjá sig um málið um helgina en nú hefur hann sent frá sér yfirlýsingu.

„Brottvikning mín úr landsliðinu í hestaíþróttum fyrir agabrot var mér og fjölskyldu minni erfið reynsla. Eftir að hafa íhugað öll málsatvik fellst ég á að fyrirliði landsliðsins átti engan annan kost í stöðunni," segir meðal annars í yfirlýsingu Þórðar. Hann segir mikilvægt fyrir ímynd hestamennskunnar á Íslandi og meðal annarra þjóða að fulltrúar Íslands komi þannig fram að sómi sé að, innan og utan keppnisvallar.

Þá sé einnig mikilvægt að eldri hestamenn séu hinum yngri góð fyrirmynd.

„Ég bið trúnaðarmenn landsliðsins, hestamenn og aðra velunnara hestamennskunnar afsökunar á agabrotum mínum."