Vinna á Lyngdalsheiði hafin á ný

Verktakafyrirtækið Klæðning hefur á ný hafið vinnu við Lyngdalsheiðarveg milli Þingvalla og Laugarvatns en verkið stöðvaðist í síðasta mánuði þegar Lýsing hirti vinnuvélarnar vegna skulda. Klæðningarmenn segjast hafa fullan hug á að klára veginn og stefna að því að hann verði tilbúinn fyrir umferð í haust og kominn með slitlag næsta vor. Bæði hafi þeir nú flutt eigin tæki á Lyngdalsheiðina og verið sé að semja við undirverktaka og tækjaleigur um fleiri vinnuvélar.

Klæðning hefur hins vegar sagt sig frá vinnu við Hellisheiðarvirkjun vegna ágreinings við Orkuveitu Reykjavíkur um greiðslur og stefnir í að það mál fari fyrir dómstóla.