Sveppi 2 á teikniborðinu

Kvikmyndin Algjör Sveppi og leitin að Villa var frumsýnd á fimmtudagskvöldið. Fjöldi ungmenna lagði leið sína í Álfabakka til að fylgjast með því þegar margar skærustu stjörnur barnanna gengu inn í kvikmyndahúsið eftir rauðum dregli.

„Þetta var alveg hrikalega flott og alveg meiri háttar skemmtilegt. Ég gæti ekki verið ánægðari,“ segir Sverrir Þór í samtali við Fréttablaðið. Hann upplýsir að mynd númer tvö sé í smíðum og reyndar fá þolinmóðir kvikmyndahúsagestir nasasjón af því sem koma skal.

„Það kemur brot úr næstu mynd á eftir kreditlistanum.“ Sverrir & co eru augljóslega ekkert að tvínóna við hlutina og ætla að leggjast í handritsskrif þegar frumsýningarhelgin er liðin.

Sverrir kveðst ekki að halda bíómyndin muni gera hann ríkan eða hjálpa honum að greiða niður myntkörfulánið. „Ég efast um það, þetta er aðallega gert til að gleðja börnin. Mynd númer 2 verður hugsuð til að græða og greiða niður þetta lán,“ segir Sverrir og skellihlær. Annars kveðst hann eiginlega vera í skýjunum yfir þessu öllu; honum þyki nefnilega svo ótrúlega skemmtilegt að horfa á sjálfan sig á hvíta tjaldinu.

„Það er alveg rosalegt kikk að líta yfir fullan sal af fólki sem er að horfa á eitthvað rugl eftir mann,“ segir Sverrir sem svífur augljóslega um á bleiku skýi. - fgg