Vilja stjórnmálasamband við stjórn Hamasliða í Palestínu

Félagið Ísland-Palestína skorar á ríkisstjórnina að koma þegar í stað á sambandi við ríkisstjórn Palestínumanna á Gazaströndinni, sem er á yfirráðasvæði Hamassamtakanna, til jafns við bráðabirgðastjórnina sem Mahmoud Abbas, forseti Palestínu, skipaði í Ramallah.

Félagið vill að ríkisstjórnin virði sjálfsákvörðunarrétt palestínsku þjóðarinnar í samræmi við ályktun Alþingis frá maí 1989 og ályktanir Sameinuðu þjóðanna. Í því felist meðal annars að viðurkenna þau stjórnvöld sem séu lýðræðislega kjörin af þjóðinni. Í síðustu kosningum til Palestínska löggjafarþingsins sem fram fóru í janúar 2006 hafi Hamassamtökin fengið meirihluta á þinginu eða nærri 60% þingmanna.

„Þrátt fyrir úrslit kosninganna og að stjórn hefði verið mynduð sem naut stuðnings hinna ólíku stjórnmálaafla í landinu neituðu Ísraelsstjórn, Bandaríkjastjórn og Evrópusambandið að viðurkenna lýðræðislega stjórn Palestínumanna. Af Vesturlöndum var Noregur eina ríkið sem viðurkenndi palestínsku stjórnina," segir í ályktun félagsins.

Í framhaldinu hafi komið til mikilla átaka Hamas og Fatah-samtakanna á Gaza sem Ísrael og Bandaríkjastjórn hafi kynt undir. Nú séu tvenn palestínsk stjórnvöld í landinu.

Að mati félagsins er stjórnmálasamband við stjórnina á Gaza framlag til sameiningar palestínsku stjórnmálaaflanna, en viðræður eru í gangi á milli þeirra meðal annars um myndun nýrrar þjóðstjórnar. „En fyrst og fremst er það stuðningur við brýnasta verkefnið gagnvart Palestínu nú, sem er að rjúfa herkvína um Gaza."