Snarpur skjálfti við Bárðarbungu

Jarðskjálftafræðingur á bakvakt Veðurstofu var ræstur út í nótt þegar skjálftahrina hófst í Bárðarbungu í norðanverðum Vatnajökli. Hrinan hófst um hálftvöleytið í nótt með skjálfta upp á 3,4 stig á aðeins eins kílómetra dýpi og á eftir fylgdi á annan tug skjálfta, flestir milli tvö og þrjú stig.

Bárðarbunga er þekkt eldstöð en að sögn Steinunnar Jakobsdóttur jarðeðlisfræðings sáust engin merki um að gos væri að hefjast.

Steinunn vill þó ekki útiloka að eldgos verði á þessum slóðum innan fárra ára. Skjálftahrina hefur einnig verið í gangi við Herðubreið undanfarna viku og þar mældist skjálfti upp á þrjú stig í fyrradag.