Hátt í 30 nýnemar í Lögregluskólanum

Tuttugu og níu nýnemar hófu í gær nám á fyrstu önn grunnnámsdeildar Lögregluskóla ríkisins. Námið á önninni tekur um fjóra mánuði og í september 2009 fara nemendurnir í fjögurra mánaða starfsþjálfun í lögreglunni, eftir því sem fram kemur á vef lögreglunnar. Þar segir að þegar starfsþjálfun lýkur, í janúarbyrjun 2010, hefjist síðan þriðja önnin og henni ljúki með útskrift í apríl 2010.

„Af þessum nýnemum hafa 14 starfað sem afleysingamenn í lögreglunni, allt frá 4 mánuðum til rúmlega tveggja ára. Að þessu sinni er meðalaldur nýnema 24,79 ár, sem er talvert lægra en verið hefur í undanförnum árgöngum. 8 konur eru í hópi nýnemanna eða 27,6%. 13 af nýnemunum hafa lokið stúdentsprófi, þrír þeirra hafa lokið iðnnámi og einn hefur lokið háskólanámi," segir á lögregluvefnum.

Starfsreynsla nýnemanna er margvísleg, en þeir hafa fengist við afgreiðslustörf, sölumennsku, smíðar, blaðburð, atvinnumennsku í handbolta, fiskvinnslu, sjómennsku og fangavörslu.