Arðsemismat stendur þótt aðstæður breytist

Arðsemismat eigin fjár vegna Kárahnjúkavirkjunar verður ekki endurskoðað þrátt fyrir að forsendur hafi breyst gríðarlega undanfarið með lækkandi álverði. Matinu var breytt í janúar í fyrra þar sem álverð hafði hækkað umtalsvert. Í desember sagði Þorsteinn Hilmarsson, upplýsingafulltrúi Landsvirkjunar, í samtali við Fréttablaðið ekki ólíklegt að matið yrði endurskoðað. Það verður ekki.

„Við ákváðum að gera ekkert sérstakt í þessu. Arðsemismatið var til að taka ákvarðanir um fjárfestingar, en nú erum við að reka mannvirkið,“ segir Þorsteinn. Hann segir ársreikninga rétta tækið til að leggja mat á reksturinn. Einn besti mælikvarði sem þar sjáist sé handbært fé frá rekstri og á síðastliðnu ári hafi fyrirtækið skilað tæplega 185 milljónum dollara til að greiða niður skuldir.

Í febrúar fór álverð í um 1.260 dollara og hafði ekki verið lægra síðan árið 2002. Það hækkaði í um 1.500 dollara í mars, en hefur tekið dýfu síðustu daga. Í endur­skoðuðu arðsemismati Landsvirkjunar í janúar 2008 var gert ráð fyrir að álverð væri nú í 2.600 krónum á tonnið. Þar segir: „Álverð og langtímaþróun þess er ein mikilvægasta forsendan í arðsemismatinu.“

Þorsteinn segir lágt álverð vissulega koma fyrirtækinu illa og það þýði lægri tekjur. Á móti komi þó lægri vaxtagjöld. Hann segir áætlanir hafa gert ráð fyrir að álverð sveiflaðist og samningarnir við Alcoa væru til 40 ára. Í umræddu endurskoðuðu mati sést hins vegar að gert er ráð fyrir að álverð hækki allt til ársins 2021, að minnsta kosti, verði þá yfir 3.000 dollurum á tonnið.

Sigurður Jóhannesson, hagfræðingur við Hagfræðistofnun Íslands, segir að samkvæmt matinu frá í janúar 2008, hafi verið gert ráð fyrir um 10 milljarða króna arði af framkvæmdinni. Ljóst sé að þær forsendur hafi breyst. Án endurskoðaðs arðsemismats sé ekki hægt að leggja mat á framkvæmdina.

Sigurður segir að í í skýrslu eigendanefndar um áramót 2003, hafi kostnaður við virkjun verið metinn á 95 milljarða króna, eða rúman milljarð Bandaríkjadala á genginu 87,5. Í skýrslu iðnaðarráðherra í fyrra hafi kostnaður verið metinn 133 milljarðar króna og miðað við gengið 69. Það þýði kostnað í dollurum upp á 1.930 milljónir. Kostnaðaráætlunin hafi því farið langt fram úr áætlun í dollurum.

kolbeinn@frettabladid.is