Dómsmálaráðherra skipar nefnd um skipan dómara

Ragna Árnadóttir dóms- og kirkjumálaráðherra hefur ákveðið að skipa þriggja manna nefnd er vinni að því að móta tillögur um setningu nýrra reglna um skipan dómara, í samræmi við verkefnaskrá ríkisstjórnarinnar. Í tilkynningu frá ráðuneytinu kemur fram að nefndin sé skipuð þeim Guðrúnu Erlendsdóttur, fv. hæstaréttardómara, sem verður formaður hennar.

Auk hennar er nefndin skipuð þeim Hákoni Árnasyni hæstaréttarlögmanni og Ómari H. Kristmundssyni stjórnmálafræðingi, dósent við Háskóla Íslands.

Miðað er við að nefndin skili tillögum sínum eigi síðar en 1. september 2009. „Fulltrúum almennings og félagasamtaka verður einnig gefinn kostur á að koma að vinnunni og því hefur ráðherra ákveðið að til viðbótar þriggja manna nefndinni verði skipaður sérstakur samráðshópur sem í eigi sæti fimm til sjö fulltrúar tilnefndir af félagasamtökum og fulltrúum atvinnulífsins," segir ennfremur.

Bryndís Helgadóttir, settur skrifstofustjóri lagaskrifstofu dóms- og kirkjumálaráðuneytisins, mun verða starfsmaður nefndarinnar.