AGS ekki deginum lengur í landinu en þörf er á

Steingrímur J. Sigfússon, fjármálaráðherra, segir að Alþjóðagjaldeyrissjóðurinn verði ekki deginum lengur í landinu en þörf er á. Hann segir fund sinn og Más Guðmundssonar, seðlabankastjóra, með Dominique Strauss Kahn, framkvæmdastjóra Alþjóðagjaldeyrissjóðsins, í Istanbúl í dag hafa verið afar gagnlegan. Steingrímur telur að uppskeran af fundum undanfarinna daga verði sú að nú komist hreyfing á málefni Íslands.

„Þeir vilja leggja sitt af mörkum til að málið komist áfram. Við fengum staðfest að það væri ekkert upp á okkur að klaga í þessum efnum og að við hefðum náð að uppfylla öll þau skilyrði sem til var ætlast af okkur. Sjóðurinn skilur mjög vel að við séum ósátt við það að málin hafa dregist," segir ráðherrann. Á fundinum kom ekki fram hvenær endurskoðun á áætlun stjórnvalda og Alþjóðagjaldeyrissjóðsins verður sett á dagskrá stjórnar sjóðsins.

Steingrímur segir mikilvægt að hreyfing komist á þessi mál. „Maður skynjar það mjög sterkt í samtölum hér að það eru allir að bíða eftir því að mál Íslands losni úr þessari sjálfheldu. Þá held held að það muni verða mikil breyting á andrúmslofti í okkar garð."



Verðum í samtarfi við AGS þjóni það tilgangi

Í hádegisfréttum Ríkisútvarpsins var fullyrt að þingmeirihluti væri fyrir því að endurskoða beri ósk um aðstoð frá Alþjóðagjaldeyrissjóðnum. Haft var eftir Þuríði Backman, þingmanni VG, að þingmenn flokksins vilji sjóðinn burt við fyrsta tækifæri. Steingrímur segir að ekki hafi verið tekin nein ákvörðun um annað en að halda samstarfi við sjóðinn áfram. Það geti þó hvenær sem er verið tekið til endurskoðunar.

„Það á enginn sér það þann draum að Ísland þurfi að vera degi lengur en landið þarf á að halda í samstarfi við Alþjóðagjaldeyrissjóðinn. Við verðum náttúrlega ekki lengi í samstarfi við sjóðinn ef það þjónar ekki neinum tilgangi og ef við komumst ekki áfram," segir Steingrímur. Fyrst um sinn verði látið á það reyna hvort að endurskoðunaráætlunin verði ekki afgreidd úr stjórn sjóðsins.