Jóhanna ræddi framferði Breta við framkvæmdastjóra NATO

Jóhanna Sigurðardóttir, forsætisráðherra, ræddi þá ákvörðun breskra stjórnvalda að beita hryðjuverkalögum gegn íslenskum hagsmunum í fyrra við Anders Fogh Rasmussen, framkvæmdastjóra Atlantshafsbandalagsins, í dag.

Jóhanna bauð Anders Fogh og fylgdarliði hans til hádegisverðar í Ráðherrabústaðnum í dag. Áður áttu þau stuttan fund þar sem Jóhanna gerði Andres Fogh meðal annars grein fyrir pólitískum og fjárhagslegum afleiðingum þeirrar ákvörðunar breskra stjórnvalda að beita hryðjuverkalögum gegn íslenskum fyrirtækjum og stofnunum á síðastliðnum vetri, að fram kemur í tilkynningu frá forsætisráðuneytinu.

„Forsætisráðherra fagnaði því að ákvæðum laganna hefði nú verið aflétt en lagði áherslu á hversu slæmt fordæmi hefði verið sett í samskiptum bandalagsríkja, þegar löggjöf sem aðallega væri ætluð til nota í sameiginlegri baráttu gegn alþjóðlegri hryðjuverkastarfsemi, hefði verið beitt gegn vinaþjóð sem hefði orðið fyrir gífurlegu áfalli vegna hruns fjármálakerfisins," segir í tilkynningunni.

Fyrr í dag fundaði Anders Fogh með Össuri Skarphéðinssyni, utanríkisráðherra. Hann sagði á fundi með blaðamönnum að hann hefði vissulega áhyggjur af efnahagslegum deilum milli aðildarríkja NATO, Hollands og Bretlands annars vegar og Íslands hins vegar. Anders Fogh vildi þó ekki tjá sig um aðgerðir Breta í október síðastliðnum.