Óskar: Grunnlaun ekki lækkuð heldur dregið úr yfirvinnu

Grunnlaun starfsmanna Reykjavíkurborgarar lækka ekki heldur verður dregið úr yfirvinnu, að sögn Óskars Bergssonar formanns borgarráðs. „Við höfðum náttúrulega samráð við okkar sviðsstjóra en það er hugsanlega misjafnt hvernig menn hafa unnið úr því hver fyrir sig. Við erum ekki að lækka grunnlaun heldur að draga úr yfirvinnu."

Samfylkingin hefur sent borgarstjóra og mannauðsstjóra Reykjavíkurborgar bréf og óskað skýringa á framgöngu við uppsagnir launasamninga og launalækkun hjá starfsfólki borgarinnar sem áformaðar eru. „Óskað er skýringa á því sem fram hefur komið í fréttum, að starfsfólk hafi fengið nær engan frest, jafnvel niður í einn dag, til að bregðast við óskum borgarstjóra um lækkun launa og/eða yfirvinnu með breyttum launasamningum," segir í bréfi Samfylkingarinnar.

Legið lengi í loftinu

Óskar segir að sviðsstjórar borgarinnar hafi verið upplýstir um gang mála. Ákveðin pólitísk stefnumörkun hafi verið tekin og hún hafi legið fyrir í meira en mánuð.

„Þetta er búið að liggja í loftinu talsvert lengi þannig ef að fólk upplifir að það sé ekki verið að hafa samráð þá er það að minnsta kosti ekki við pólitíkina að sakast," segir Óskar.

Ekki góð fjölskyldupólitík

Meginmálið kemur fram í aðgerðaráætlun borgarinnar, að sögn Óskars. „Við stöndum vörð um störfin, segjum engum upp, hækkum ekki gjaldskrárnar og skerðum ekki grunnþjónustuna."

Kostnaður borginnar við yfirvinnu er óeðlilega hár miðað við 32 milljarða launakostnað, að mati Óskars, en borgin greiðir rúma 5 milljarða á ári fyrir yfirvinnu. „Við teljum það líka ekki góða fjölskyldupólitík að starfsmenn Reykjavíkurborgar vinni svona mikila yfirvinnu."

Ekki náðist í Hönnu Birnu Kristjánsdóttir, borgarstjóra. Samkvæmt upplýsingum á skrifstofu borgarstjóra er hún á fundi sjálfstæðismanna sem fram þessa stundina á Grand Hótel.