Safnadagur á Suðurlandi

Matur og menning eru í fyrirrúmi á Suðurlandi þessa helgi þegar dyr opinberra staða, samkomuhúsa og safnhúsa eru upp á gátt. Þetta er í annað sinn sem hátíðin er haldin og leggur undir sig Suðurlandið allt frá Hornafirði til Hveragerðis. Og gnægtahorn er í boði, til munns, handa og hugar.

Hátíðinni er ætlað að þjappa saman þeim dreifðu kröftum sem eru að starfi á þessu víðfeðma landsvæði. Hornfirðingar eru nú með í fyrsta sinn. Þorbergssetur á Hala verður opið báða dagana þar sem kynnt verður ný sýning um söguslóðir á Suðausturlandi. Á sunnudag er sýning á gripum Þórbergsseturs.

Á Klaustri bjóða Kirkjubæjarstofa, Héraðsbókasafnið, Hótel Geirland, Kirkjuhvoll og Hótel Klaustur upp á mismunandi dagskrá, þing, söng og veislukost á villibráðarkvöldi. Fýlaveisla er líka í boði í kvöld á veitingastaðnum Strönd við Víkurskála.

Í Þykkvabænum er opið í tveimur galleríum, Smákoti og Kofa við Háf, og þangað eru allir velkomnir. Meðfram veginum eru uppi ljósmyndir frá sögu þessa þúsund ára þorps.

Í Sögusetrinu á Hvolsvelli verður í dag opnuð sýning á uppstoppuðum fuglum en í kvöld verða tónleikar á Hvoli. Handverkshúsið á Hellu verður opið um helgina og á Hótel Rangá er boðið upp á hátíðarmatseðil og bókasafnið á Hellu er opið. Í safninu á Skógum var í gær mikið þing um safnstarfið sem hefur staðið yfir í sextíu ár. Þar var rætt um framtíð safnsins. Í dag og á morgun er þar boðið upp á samfellda dagskrá, leiðsögn og sagnastund.

Eyjamenn fagna safnadeginum með gestum og gangandi en þar er margt í boði, bæði í dag og á morgun: frumsýning á nýrri mynd Páls Steingrímssonar og opnun á stofu í byggðasafninu sem honum er helguð. Maggi Eiríks spilar í kvöld.

Í bæjunum við ströndina, Eyrarbakka, Stokkseyri og Þorlákshöfn er boðið upp á heimsóknir: Draugasetrið, Hólmaröst, Vinnustofa Gussa, Svartiklettur og Veiðisafnið, Húsið og Gónhóll bjóða gesti velkomna.

Listasafnið í Hveragerði, Bókasafnið og Náttúrulækningahælið opna um helgina með margvíslegu sýningarhaldi.

Pakkhúsið í Árborg verður með kvikmyndasýningar og hin söfnin á Selfossi bjóða upp á sýningar og dagskrár. Opið er í Þingborg og Forsæti.

Dagskrá þessa helgina vítt og breitt um Suðurland er óvenju fjölbreytt og kallar á straum gesta vestan að úr fjölmenninu austur, svo fjölbreytt að ekki dugar til stutt blaðagrein, en vefurinn www.sofnasudurlandi.is birtir alla dagskrána með hennar kostaboðum og sýnir að Sunnlendingar eru höfðingjar heim að sækja.

pbb@frettabladid.is