Rýr kvóti næstu ár

Hafrannsóknastofnun (Hafró) leggur til að þorskkvótinn á næsta fiskveiðiári verði 150 þúsund tonn. Það er tíu þúsund tonnum minna en á yfirstandandi fiskveiðiári. Þó ber þess að geta að upphaflega var úthlutað 130 þúsund tonnum í fyrra og þar með farið eftir ráðleggingum Hafró en síðan var 30 þúsund tonnum bætt við. Útlit er fyrir að þess verði að bíða í þrjú til fjögur ár uns hægt verði að úthluta verulega meiri afla en nú.

Einnig leggur stofnunin til að verulega verði dregið úr veiðum á ufsa og ýsu. Þar að auki er útlitið ekki gott fyrir loðnuvertíð næsta vetur en hins vegar mun betra fyrir veturinn þar á eftir.

Í skýrslu stofnunarinnar sem kynnt var fjölmiðlum í gær segir að heildarafli úr íslenska þorskstofninum árið 2008 hefði verið 147 þúsund tonn sem sé lægsti ársafli í hartnær 70 ár.

„Þessi litli afli helgast náttúrlega af því að við erum að skera niður til að byggja upp til framtíðar,“ segir Jóhann Sigurjónsson, forstjóri Hafró.

„Hefðum við veitt af sama sóknarþunga og við gerðum fyrir nokkrum árum þá gætum við auðveldlega veitt 250 þúsund tonn en þá værum við heldur ekki að ná markmiðum okkar um uppbyggingu á hrygningarstofni þorsks og að ná þeirri aldursbreidd í stofninum sem við teljum algjörlega nauðsynlega til að auka líkurnar á nýliðun í framtíðinni.“

Hafró hefur frá árinu 2007 miðað við 20 prósenta veiðihlutfall og hefur ný ríkisstjórn staðfest þá nýtingarstefnu til næstu fimm ára.

Jóhann segir enn fremur að árangurinn af uppbyggingunni komi í ljós eftir þrjú, fjögur ár eða þar til hægt verður að veiða úr þorskárganginum 2008.

Friðrik J. Arngrímsson, framkvæmdastjóri Landssambands íslenskra útgerðarmanna (LÍÚ), segir að þótt sjómenn hafi fundið fyrir góðu fiskiríi upp á síðkastið komi þessi niðurstaða þeim ekki á óvart.

„Við vorum búnir að sjá það eftir togararallið að við ættum von á einhverju á þessa leið,“ segir hann. Hann segir enn fremur að ljóst mætti vera að dregið verði úr ýsuveiðum en þær hafa verið meiri en nokkru sinni undanfarin ár.

„En almennt eru sjómenn þeirrar skoðunar að ástand stofnanna sé mun betra en þessi gögn Hafró gefa til kynna,“ segir hann.

jse@frettabladid.is