GSM-endurvinnsla í Grafarvogi

Gylfi Gylfason í Símabæ í Hverafold hefur sett á fót GSM-endurvinnslu í búðinni. Endurvinnslan hefur tekið mikinn kipp í kreppunni. „Það er bara svo mikil taktbreyting í þjóðfélaginu núna. Farsímasnobbið er að deyja út,“ segir hann.

Gylfi segir að 120.000 símar hafi selst árlega á Íslandi síðustu árin og því sé ekki óraunhæft að áætla að um 200.000 þúsund símar liggi í skúffum landsmanna. „Mig vantar þessa síma! Innlegg í símaendurvinnsluna skilar sér í gjaldeyrissparnaði og hagstæðari kjörum handa náunganum. Þeir sem leggja inn síma geta fengið afslátt af vörum, eða skipt og fengið aðra varahluti í staðinn. Það fer allt út sem kemur inn. Ég tek á móti öllum tegundum GSM-síma og vil endilega fá gömlu hleðslutækin líka. Ekkert fer til spillis, allir nothæfir partar eru nýttir og ég sendi ónýt móðurborð úr landi til frekari endurnýtingar.“

Auk nýrra síma selur Gylfi síma sem búið er að púsla saman. Hægt er að kaupa nothæfan síma á þúsund kall í Símabæ. Nokia-símar eru bestir að mati Gylfa. „Þeir eru notendavænastir, á þeim er lág bilanatíðni og auðvelt er að gera við þá. Sony-símar eru hins vegar alverstir. Ekkert nema bögg, erfitt að gera við þá og dýrir varahlutir.“

Gylfi reynir að gera við alla síma á staðnum. „Það er ekkert „komdu eftir tvær vikur“ hjá mér. Sumar búðir lesa bara á strikamerki og geta ekki annað, en hér er öllu reddað og kúnninn sendur ánægður út.“