Algjör óvissa um endurkomu Ingibjargar

Fullkomin óvissa eru um hvenær Ingibjörg Sólrún Gísladóttir utanríkisráðherra snýr aftur til starfa. Hún verður lögð inn á Landspítalann þegar hún kemur heim úr meðferð í Svíþjóð í vikulokin.

Í lok september gekkst utanríkisráðherra undir aðgerð til að fjarlægja heilaæxli. Fyrir skömmu fór hún til geislameðferðar á Karónlínska sjúkrahúsinu í Stokkhólmi. Þar átti að vera um lokahnykk meðferðar að ræða og hún yrði í burtu í þrjá til fimm daga.

Í síðustu viku var greint frá því að ráðherra yrði lengur undir læknishendi í Svíþjóð en ráð hafi verið fyrir gert. Frekari sýnataka færi fram áður en til geislameðferðar kæmi.

Nú síðdegis var tilkynnt að Ingibjörg Sólrún hefði gengist undir aðgerð þar sem sýni hafi verið tekin vegna heilaæxlis og hluti þess jafnframt fjarlægður. Aðgerðin hafi heppnast vel en ákvörðun um frekari meðferð lægi ekki fyrir.

Ingibjörg Sólrún Gísladóttir sé væntanleg heim í vikulokin og þá verði hún lögð inn á Landspítala háskólasjúkrahús þar sem læknar taki ákvörðun um framhaldið.

Því er alls óvíst hvenær utanríkisráðherra komi aftur til starfa.