Gengið verður frá fjölmörgum lánum á næstunni

Fjármálaráðherra reiknar með að á næstu dögum eða vikum verði gengið frá lánum fjölmargra þjóða til Íslendinga vegna bankahrunsins. Sendinefnd er á leið til Moskvu til að ræða allt að 60 milljarða lántöku frá Rússum.

Samkomulag ríkisstjórnarinnar við Breta og Hollendinga vegna Icesave er í raun hluti af efnahags- og endurreisnaráætlun stjórnvalda, þar sem slíkt samkomulag var skilyrði að hálfu Alþjóðagjaldeyrissjóðsins og ýmissra vinaþjóða fyrir því að koma Íslendingum til aðstoðar með lánveitingum. Nú þegar samkomulagið liggur fyrir má reikna með að skriður komist á samninga um lán frá þeim þjóðum sem gefið hafa fyrirheit um lánveitingar.

Reyndar hefur Steingrímur J. Sigfússon fjármálaráðherra greint frá því að samningar við Norðurlandaþjóðirnar séu komnir langt á veg. Og greint hefur verið frá því að íslensk sendinefnd sé á leið til Moskvu í Rússlandi, til að semja um lán frá Rússum.

Steingrímur sagði á fréttamannafundi ríkisstjórnarinnar í gær að það væri ánægjulegt að búið væri að bóka fund með Dimitri Pankin fjármálaráðherra Rússlands í næstu viku. Hann vonaðist til að það tækist að ganga frá lánasamningum við hin Norðurlöndin jafnvel í þessari viku. Rússar hafi nefnt 500 milljónir dollara á sínum tíma, en ekki væri ljóst hvaða upphæð væri í boði frá þeim nú.

Á núverandi gengi krónunnar eru 500 milljónir dollara um 62 milljarðar króna. Heildarlántaka ríkissjóðs frá Alþjóðagjaldeyrissjóðnum verður 2,1 milljarðar dollara, eða um 260 milljarðar króna og á sínum tíma var talað um að hópur ríkja myndi lána Íslendingum samsvarandi upphæð. Eina þjóðin sem gengið hefur frá láni til Íslendinga eru Færeyingar, sem lánuðu okkur sex milljarða króna.

„En málin eru nánast í höfn gagnvart hinum Norðurlöndunum og langt komin varðandi Pólverja," sagði Steingrímur á fréttamannafundinum í gær. Að ná þessum málum fram og klára samningana um Icesave væru mikilvægir áfangar í heildaráætlun stjórnvalda.