Hefði viljað kjósa fyrr

Því fyrr sem verður kosið því betra að mati Steingríms J. Sigfússonar formanns Vinstri grænna. Hann segir Vinstri græn helst hefðu viljað sjá kosningar síðasta laugardag fyrir páska, sem er í byrjun apríl.

Steingrímur segist sleginn yfir tíðindum dagsins. Hugur hans sé hjá Geir og hann voni að honum vegni sem allra best. „Mér finnst afar skynsamlegt og yfirvegað hjá honum að draga sig í hlé og einbeita sér að bata," segir Steingrímur.

Aðspurður hvort VG hefðu ekki viljað sjá ríkisstjórnina stíga til hliðar fram að kosningum viðurkennir Steingrímur það. „Auðvitað væri betra ef ný og sterk ríkisstjórn gæti haldið utan um þjóðfélagið," segir Steingrímur. Hann segir kröfur almennings undanfarið vera tvíþættar, að ríkistjórnin víki og boðað verði til kosninga. Önnur krafan sé í höfn en hin standi.

Hann vill nú að formenn flokkanna hittist og fari yfir stöðuna. Kjördagur verði tímasettur og sameinast um stutta en snarpa kosningabaráttu.