Dauð hross í skurði og folald troðið niður við heyrúllu

Héraðsdýralæknir og búfjáreftirlitsmaður Búnaðarsamtaka Vesturlands hafa gert alvarlegar athugasemdir við aðbúnað hrossa á tveimur bæjum á Mýrum í Borgarnesi.

Bréf þess eðlis var sent sveitastjórn Borgarbyggðar, sýslumanns, yfirdýralæknis auk Heilbrigðiseftirlits Vesturlands og ábúanda á jörðunum sem í hlut eiga.

Lýsingar í bréfinu eru óhugnanlegar. Þar segir meðal annars:

"Nú þegar við fórum blasti við okkur mörg dauð hross í skurði sem hálfpartinn hafði verið grafið yfir og hræ af folaldi hafði verið troðið niður við heyrúllur sem gefnar höfðu verið. Hræ af einu hrossi var einnig í skurði sem fullur var af vatni."

Þegar Vísir hafði samband við héraðsdýralækninn Gunnar Gauta Gunnarsson sagði hann aðbúnað talsvert verri á öðrum bænum heldur en hinum.

Hann sagði að hestarnir sem lágu dauðir í skurðinum hefðu verið urðaðir á réttan hátt á föstudaginn síðasta. Engu að síður voru lögregla og búfjáreftirlitsmaður kölluð að landinu á mánudag til þess að fjarlægja þau hross sem þar voru enn.

„Þau undu ekki hag sínum vel. Þau voru komin á miðjan veg," segir Gunnar en hestarnir voru þá fyrir umferð sem þar átti leið hjá.

Ábúandi á jörðinni er ekki með fasta viðveru á bænum að sögn Gunnars. Honum er þá skylt að tilnefna tilsjónarmann. Það hafi ekki verið gert. Aftur á móti eru engin sérstök viðurlög tilnefni maður ekki tilsjónarmann yfir jörðinni.

Eigandi jarðarinnar er tæplega fimmtugur karlmaður.

Málið er nú í höndum sýslumanns sem tekur ákvörðun hvort kært verði í málinu.

Það var Skessuhorn sem greindi fyrst frá málinu.