Samstarfið í óvissu

Tillaga Sjálfstæðisflokksins um kosningar í maí dugar ekki ein og sér til að halda stjórnarsamstarfinu áfram. Ingibjörg Sólrún Gísladóttir segir ótímabært að fullyrða nokkuð um samstarfið fyrr en hún hefur hitt Geir H. Haarde. Þau munu ræða saman í dag og fara yfir stöðuna.

Viðmælendur Fréttablaðsins eru sammála um að samband formannanna sé gott og það gæti orðið til þess að stjórnin héldi.

Óánægja sé innan þingflokks Samfylkingarinnar og grasrótarinnar. Það að flýta kosningum slái eitt og sér ekki á þá óánægju. Þung krafa er um að meira þurfi að koma til; brotthvarf þeirra sem hvað mest hafa verið gagnrýndir. Eru seðlabankastjóri og forstjóri Fjármálaeftirlits nefndir í því samhengi. Ingibjörg segir mikilvægt að hlusta á grasrótina. Hún hafi hins vegar verið kosin til að tala, vinna og hafa skoðanir.

Einn viðmælandi Fréttablaðsins sagði að ekki hefði tekist að klára stór verkefni á þeim ríflega 100 dögum sem liðnir eru frá bankahruninu. Takist það allt í einu með Sjálfstæðisflokknum sé það hið besta mál, en það verði að teljast ólíklegt. Annar sagði ljóst að Sjálfstæðisflokkurinn segði Samfylkingunni ekki fyrir um hvenær ætti að kjósa.

Sjálfstæðismenn eru líka margir hverjir ósáttir við samstarfið og telja Samfylkinguna ekki í því af heilindum. Raddir innan flokksins telja réttast að slíta því, enda hafi Samfylkingin sýnt af sér ábyrgðarleysi. Allt var á borðinu á fundi miðstjórnar og þingflokks í gær og bæði mælt með stjórnarslitum og gegn frestun landsfundar. Ofan á varð þó að fallast á tillögu formanns um áframhaldandi samstarf fram að kosningum.