Samdráttur ríkissjóðs 67 milljarðar

Tekjur ríkissjóðs munu skreppa saman um nærri 67 milljarða króna á þessu ári, sem samsvarar nánast kostnaðinum við að reka alla framhaldsskóla, háskóla og löggæslu landsins.

Ríkissjóður gildnaði í góðærinu en þegar heimilin eru farin að halda að sér höndum og fyrirtæki mörg í kröggum bitnar það beint á okkar sameiginlega sjóði. Strax fyrstu þrjá mánuði ársins kom sex milljörðum minna í kassann heldur en á sama tíma í fyrra.

Laun hafa víða lækkað í samfélaginu, því hafa tekjur ríkissjóðs af tekjuskatti einstaklinga dregist saman um 1,3% - en öllu meiri er samdrátturinn vegna tekjuskatts fyrirtækja, eða 20,1%.

Lægri tekjur og hærri afborganir þýðir að minna er keypt. Ríkið innheimtir virðisaukaskatt af öllu mögulegu, allt frá mjólkurpotti að hótelherbergjum. Virðisaukaskatturinn skilaði ríkissjóði 18,4% minna nú en í fyrra, eða rúmum sex milljörðum. Bílasala hefur hrunið og ríkissjóður fékk því 90,7% minna í kassann af vörugjöldum bíla fyrstu 3 mánuði ársins.

Við fyrstu sýn virðist landinn lítið hafa dregið af sér í kaupum á áfengi og tóbaki en þegar nánar er rýnt í tölurnar kemur í ljós að tekjur ríkisins af sopanum dýra hefur minnkað öllu meira en reyknum skaðlega, eða nærri sjö prósent.

Tekjur ríkissjóðs í fyrra voru um 465 milljarðar en áætlaðar tekjur þessa árs eru tæpir 398 milljarðar króna. Munurinn er tæpir 67 milljarðar.

Til að glöggva sig á tölunum má minna á að það kostar ríkið liðlega þessa upphæð að reka allra framhalds- og háskóla landsins og löggæsluliðið allt. Hins vegar er þetta aðeins um 60% af þeirri upphæð sem Kaupþing sá sér fært að veita kaupsýslumanninum Robert Tchenguiz í yfirdrátt.