Samfylkingarmenn í Reykjavík vilja tafarlaus stjórnarslit

Samfylkingarmenn í Reykjavík vilja tafarlaus stjórnarslit. Ályktun þessa efnis var samþykkt á félagsfundi í Þjóðleikhúskjallaranum nú fyrir stundu.

Félagsmenn vilja að þingflokkur Samfylkingarinnar beiti sér fyrir því að ríkisstjórnarsamstarfinu verði nú þegar slitið og ný stjórn mynduð fram að kosningum sem fram fari eigi síðar en í maí. Ályktunin var samþykkt með dynjandi lófaklappi fundargesta.



Núverandi þingmenn gefi ekki kost á sér aftur

Eftir að framsögumenn kvöldsins, þeir Lúðvík Bergvinsson og Mörður Árnason, höfðu lokið við ræður sínar voru almennar umræður sem félagsmenn gátu tekið þátt í. Einn fundarmanna lagði til að þegar kosið yrði myndu núverandi þingmenn Samfylkingarinnar ekki gefa kost á sér til þingsetu aftur. Hlaut sú tillaga mikið lófaklapp.

Þá kom fram á fundinum að samfylkingarmenn óttuðust ekki ef þeir þyrftu að sitja í minnihluta. Lýðræðið myndi hafa sinn gang.