Jóhanna vildi stjórnlagaþing

Jóhanna Sigurðardóttir, væntanlegur forsætisráðherra, lagði til árið 1996 að efnt yrði til sérstaks stjórnlagaþings, skipað þjóðkjörnum fulltrúum, til að vinna að breytingum á stjórnarskrá lýðveldisins.

Þingmenn Framsóknarflokksins ætla að leggja fram frumvarp um stjórnlagaþing næst þegar þing kemur saman en stuðningur við frumvarpið er eitt þriggja skilyrða sem flokkurinn setur fyrir stuðningi sínum við minnihlutastjórn Samfylkingar og Vinstri grænna. Margt er líkt með frumvarpi framsóknarmanna og Jóhönnu.

Úr höndum stjórnmálamanna

„Mikilvægt er að höggva á þennan hnút. Það er ekki lengur hægt að búa við það, að löggjafarsamkoman geti ekki tekið á mikilvægustu grundvallarþáttum í stjórnskipan landsins sem er endurskoðun stjórnarskrárinnar og að jafna atkvæðavægi landsmanna," sagði Jóhanna á heimasíðu sinni í desember 1996.

Á fundi með blaðamönnum fyrr í dag sagði Siv Friðleifsdóttir að kominn væri tími á að taka málið úr höndum stjórnmálamanna. Við sama tækifæri sagði Birkir Jón Jónsson að óeðlilegt að þingmenn fjalli sjálfir um breytingar á borð við kosningafyrirkomulag, kjördæmaskipan og fjölda þingmanna.