Þorgerður hreinsar út af skrifstofunni

Þorgerður Katrín Gunnarsdóttir, fráfarandi menntamálaráðherra, segir arftaka sinn taka við góðu búi. Ráðherrar sjálfstæðismanna eru nú í óða önn að pakka saman.

Sjálfstæðismenn voru með sex ráðuneyti í fráfarandi ríkisstjórn. Af þeim hefur Björn Bjarnason gengt ráðherraembætti lengst eða í tæp 14 ár. Alls hafa sjálfstæðismenn verið í ríkisstjórn samfleytt í 18 ár eða frá árinu 1991.

Þorgerður Katrín Gunnarsdóttir tók við embætti menntamálráðherra í janúar árið 2004. Hún eins og aðrir ráðherrar sjálfstæðismanna vinnur nú að því að undirbúa komandi ráðherraskipti.

Spurð hvort hún sé búin að hreinsa út af skrifstofunni sinni segir Þorgerður: „Já ég held að ég sé búin að hreinsa nokkuð mikið út bara á síðustu fimm árum í ráðuneytinu og búin að endurskipuleggja margt. Síðustu dagarnir hérna er ég búin að hreinsa og gera klárt væntanlega fyrir Katrínu Jakobs ef hún kemur í þetta ráðuneyti."

„Fræg stjórnmálakona sagði þegar hún kvaddi félagsmálaráðuneytið á sínum tíma að hún mundi koma aftur. Jóhanna gerði það. Ég væri alveg tilbúin til þess að koma aftur í menntamálaráðuneytið en við verðum líka að hafa það hugfast að breytingar veita alltaf möguleika á nýjum tækifærum. Við verðum að ná í þau tækifæri, en stóra myndin er sú að ég fer héðan mjög sátt," segir Þorgerður aðspurð hvort hún muni snúa aftur í menntamálaráðuneytið.