Veikindi orsökuðu tvö banaslys - reglur verði endurskoðaðar

Rannsóknarnefnd umferðarslysa hefur lokið rannsókn tveggja banaslysa í umferðinni sem urðu á síðasta ári. Rannsóknarnefndin telur nauðsynlegt að reglur um mat á akstursfærni aldraðra og sjúkra ökumanna verði endurskoðaðar.

Fyrra slysið varð á Hrútafjarðarhálsi við Svertingsstaði í janúar 2008 þar sem eldri ökumaður ók í veg fyrir vörubifreið á vegamótum. Líkindi eru til að mati nefndarinnar að ökuhæfni þess sem fórst hafi verið skert verulega vegna heilabilunar.

Síðara slysið varð á Reykjavíkurvegi við Stakkahraun í mars 2008. Orsök slyssins má rekja til þess að ökumaður sem fórst var vanhæfur til aksturs vegna veikinda og lyfjanotkunar þeim tengdum. Ók ökumaður í veg fyrir jeppabifreið á gatnamótum Reykjavíkurvegar og Stakkahrauns.

Í nýlegri varnaðarskýrslu um skerta ökuhæfni vegna veikinda bendir RNU á að sjúklingar þurfi sjálfir að íhuga ökuhæfni sína af ábyrgð. Hvetur rannsóknarnefndin ökumenn, sem eru í áhættuhópi vegna veikinda eða lyfjanotkunar til að gangast undir skoðun á ökuhæfi sínu hjá læknum og stjórnvöldum.

Tilkynningu Rannsóknarnefndar umferðarslysa er hægt að lesa hér.