Össur: Þeir hafa beðið í 18 ár

Fundi forystumanna Samfylkingar og Vinstri grænna sem átti að hefjast klukkan ellefu í Alþingishúsinu seinkaði um rúmlega hálftíma. Össur Skarphéðinsson, iðnaðarráðherra, segir að honum og Jóhönnu Sigurðardóttur hafi seinkað vegna þess að þau sátu á fundi með Ingibjörgu Sólrúnu Gísladóttur, formanni Samfylkingarinnar, á heimili hennar í Vesturbænum.

Aðspurður hvort það væri ekki móðgun við forystumenn Vinstri grænna að mæta seint sagði Össur og hló: „Þeir eru búnir að bíða í 18 ár."

Myndun minnihlutastjórnar flokkanna gengur vel, að mati Jóhönnu Sigurðardóttir forsætisráðherraefnis Samfylkingarinnar og Steingríms J. Sigfússonar formanns Vinstri grænna. Þau segja að stjórnarsáttmáli og ráðherraskipan nýrrar ríkisstjórnar verði líklega kynntur á morgun.

Minnihlutastjórn Samfylkingar og Vinstri grænna tekur að öllum líkindum formlega við á laugardaginn.