Framsóknarmenn funduðu með Ragnari Árna og Jóni Daníelssyni

Forystumenn Framsóknarflokksins funduðu með Ragnari Árnasyni prófessor í hagfræði við Háskóla Íslands og Jóni Daníelssyni, dósent við London School of Economics, í hádeginu.

Eins og kunnugt er mun Framsóknarflokkurinn verja minnihlutastjórn Samfylkingarinnar og Vinstri grænna falli. Höskuldur Þórhallsson sagði í samtali við fréttastofu í gær að framsóknarmenn vildu að hin nýja stjórn myndi vinna að fáum málum en góðum. Nefndi hann meðal annars breytingar á Seðlabankanum og breytingar á eftirlaunalögum.

Forystufólk Framsóknarflokksins mun kynna áherslur sínar vegna stuðnings við minnihlutastjórnina fyrir fréttamönnum klukkan þrjú í dag. Farið verður yfir helstu atriði í efnahagsmálum og sérstaklega kynnt tillaga um stjórnlagaþing, sem kosið yrði til í haust og hafi það hlutverk að semja nýja stjórnarskrá fyrir Ísland.

Viðstödd fundinn verða Sigmundur Davíð Gunnlaugsson, formaður Framsóknarflokksins, Birkir Jón Jónsson varaformaður, Eygló Harðardóttir ritari og Siv Friðleifsdóttir, formaður þingflokks.