Kveikti í íbúð og setti bíl í sjóinn

Karlmaður um þrítugt hefur verið ákærður fyrir að kveikja í fatahrúgu innan dyra og stökkva síðan út úr bíl sem hann ók að höfninni á Hvammstanga, þannig að bíllinn rann út í sjó.

Maðurinn er ákærður fyrir að hafa kveikt í kjallaraíbúð í þríbýlishúsi á Hvammstanga í febrúar. Það gerði hann með því að leggja eld að fatnaði sem lá ofan á rúmdýnu í svefnherbergi hans í íbúðinni. Með því olli hann eldsvoða sem hafði í för með sér almannahættu, verulegt eignatjón auk hættu á yfirgripsmikilli eyðingu eigna annarra hefði eldurinn náð að breiðast út frekar áður en hann var slökktur af slökkviliði, eins og segir í ákæru.

Jafnframt er maðurinn ákærður fyrir að hafa tekið bíl traustataki og ekið honum undir áhrifum áfengis heiman að frá sér að hafnarsvæðinu og stokkið þar á ferð út úr bifreiðinni sem rann áfram og hafnaði í sjónum.

Vátryggingafélag Íslands gerir skaðabótakröfu á hendur manninum að upphæð ríflega 4,5 milljónir króna. - jss