Daníel Bjarnason hljómsveitarstjóri hlaut styrk

Úthlutað var úr minningarsjóði Kristjáns Eldjárns gítarleikara við athöfn í listasafni Sigurjóns Ólafssonar í dag á afmælisdegi Kristjáns. Þetta er í annað skiptið sem úthlutað er úr sjóðnum.

Sjóðnum er ætlað að verðlauna framúrskarandi tónlistarmenn. Að þessu sinni hlaut Daníel Bjarnason, hljómsveitarstjóri og tónskáld, verðlaunin; styrk að upphæð einni milljón króna. Verk hans hafa verið flutt víða um heim og unnið með fjölda erlendra tónlistarmanna.

Daníel var einn af stofnendum kammersveitarinnar Ísafoldar árið 2002 og hefur verið listrænn stjórnandi og hljómsveitarstjóri hennar frá byrjun.

Minningarsjóður Kristjáns Eldjárn gítarleikara var stofnaður af ættingjum hans, vinum og samstarfsmönnum eftir að hann lést 22. apríl 2002 tæplega þrítugur að aldri eftir nær tveggja ára erfið veikindi.

Við verðlaunaathöfnina spilaði hljómsveit skipuð bræðrum Kristjáns, þeim Úlfi, Ara og Halldóri og frænda hans, Kristjáni. Dóttir Kristjáns, Unnur Sara, fór síðan fyrir hljómsveitinni og söng. Sveitin flutti meðal annars lag sem Kristján samdi sjálfur.

Atli Rafn Sigurðarson, stjórnarmaður í sjóðnum og æskuvinur Kristjáns, segir ánægjulegt að geta heiðrað minningu Kristjáns með þessum hætti. „Það var frábært að finna verðugan verðlaunahafa sem er mjög vel til þess fallinn að halda nafni hans á lofti. Svo er auðvitað gaman að veita honum svona styrk inn í framtíðina."