Skrifar ástarbréf fyrir orkufyrirtækin

Steingrímur J. Sigfússon fjármálaráðherra hefur ritað meðmælabréf fyrir HS Orku og Orkuveitu Reykjavíkur til erlendra fjárfesta. Bréf af þessu tagi eru gjarnan nefnd ástarbréf og er ætlað að liðka til fyrir fjárfestingum hérlendis. Steingrímur staðfestir þetta en vill að öðru leyti lítið tjá sig um efni bréfanna.

Ráðherra segir eðlilegt að aðstoða við fjármögnun við þær aðstæður sem nú eru uppi. Fjármálamarkaður sé í frosti og því sé eðlilegt að liðka fyrir. „Það stendur allt sem við höfum sagt að við styðjum og greiðum götu þeirra framkvæmda sem ákveðnar höfðu verið áður en við komum í ríkisstjórn. Þá erum við áhugasöm um að skoða ný verkefni,“ segir Steingrímur.

Sú ákvörðun Svandísar Svavarsdóttur að fella úr gildi úrskurð Skipulagsstofnunar um að framkvæmdir tengdar álverinu í Helguvík þurfi ekki að fara í sameiginlegt umhverfismat hefur verið nokkuð gagnrýnd, ekki síst af fulltrúum atvinnulífsins. Hafa þeir sakað ráðherra um að bregða fæti fyrir verkefnið og það stangist á við stöðugleikasáttmálann.

Steingrímur segir að menn ættu frekar að huga að fjármögnuninni. „Vandamálið hefur fyrst og fremst verið að fjármögnun er í frosti. Tafir á verkefninu er ekki neinu öðru um að kenna.“

Hann segir umhverfisráðherra einfaldlega hafa heimilað frekari skoðun málsins og óskað eftir frekari gögnum. Engin efnisleg afstaða sé tekin til málsins og ekki ætti að taka langan tíma til að skoða málið, kannski mánuð. Aðrar ástæður valdi töfum; það vanti upp á fjármögnun bæði virkjunar og álvers.

Samkvæmt stöðugleikasáttmálanum á ýmsum áföngum að hafa verið náð 1. nóvember, stýrivextir komnir í eins stafs tölu, losað hafi verið um gjaldeyrishömlur og hindrunum í vegi álvers í Helguvík hrint úr vegi, svo eitthvað sé nefnt.

Steingrímur segir ýmislegt hafa gengið eftir sem samið var um í sáttmálanum. Ákveðnir hlutir hafi tafist, svo sem vaxtalækkun, vegna Icesave. „Ég held að það væri mikið glapræði að gefa sér fyrirfram að menn væru betur settir með því að segja upp kjarasamningum eða auka á óstöðugleikann með því að stefna því mikilvæga samstarfi sem náðist á milli ríkis, sveitarfélaga og aðila vinnumarkaðar í hættu.“

kolbeinn@frettabladid.is