Grásleppukarlar skila yfir milljarði í þjóðarbúið

Grásleppan er veidd á vorin þegar hún sækir í þaragróðurinn á grunnsævi til að hrygna. Henni hefur fram til þessa að mestu verið hent til baka í sjóinn eftir að búið er að rista á henni kviðinn og ná hrognunum. Þetta er að breytast því markaður hefur opnast í Kína fyrir heilfrysta grásleppu.

Þetta er atvinnugrein dreifbýlisins en tæplega þrjúhundruð bátar hafa leyfi til grásleppuveiða, nokkrir þeirra eru gerðir út frá höfninni í Skarðsstöð við Breiðafjörð. Þar kvarta menn undan lélegri veiði í ár. Hjá Landssambandi smábátaeigenda segir Örn Pálsson að minna hafi veiðst um allt land og áætlar tíu prósenta samdrátt í ár, þrátt aukna sókn.

En annað gleður grásleppukarla. Hilmar Kristinsson, grásleppusjómaður á Skarði, segir verðið mjög gott og flest bendi til að það fari stígandi.

Hilmar fer með grásleppuhrognin á næsta sveitabæ en á Geirmundarstöðum byggðu þau Bryndís Karlsdóttir og Þórður Baldursson upp grásleppuverkun til að mæta samdrætti í sauðfjárrækt. Þarna í sveitinni er sem sagt verið að verka grásleppuhrogn svo þau verði að dýrindis kavíar. Verðið sem sjómenn fá fyrir hverja tunnu er komið upp í 120 þúsund krónur, var 65 þúsund krónur í fyrra.