Borgarstjórn samþykkir Græn skref í Reykjavík

Forgangsreinum fyrir strætisvagna og tengingum fyrir rafmagnsbíla verður fjölgað á árinu og hjólreiðaáætlun fyrir Reykjavík verður brátt samþykkt. Þetta er meðal þeirra aðgerða sem hrint verður í framkvæmd í nafni Grænna skrefa sem borgarstjórn samþykkti í dag. Grænu skrefin fela í sér á fjórða tug aðgerða í umhverfismálum.

„Það er ánægjulegt hversu vel Græn skref í Reykjavík hafa gengið og mun Reykjavíkurborg áfram stíga stór vistvæn skref og verða til fyrirmyndar í umhverfismálum," segir Þorbjörg Helga Vigfúsdóttir formaður umhverfis- og samgönguráðs Reykjavíkurborgar.

Í fréttatilkynningu frá Reykjavíkurborg kemur fram að fjörutíu og fimm græn skref voru sett fram árið 2007 og nú er 90% þeirra annað hvort lokið eða komin vel af stað. Grænu skrefin nú eru sett fram í tíu liðum eins og áður: Miklu betri strætó, verðlaunum visthæfa bíla, göngum lengra, hjólum meira, lifandi og skemmtileg borg, betra loft fyrir alla, meiri endurvinnsla, byggjum vistvæn hverfi, visthæfari leik- og grunnskólar, höldum borginni hreinni og Reykjavíkurborg til fyrirmyndar.

Í áætluninni er gert ráð fyrir að gönguleiðir skólabarna verða merktar og kynntar sérstaklega og bekkjum og handriðum komið fyrir við göngustíga sem tengja búsetusvæði eldri borgara og nálæg útivistarsvæði. Hafist verður handa við að leggja hjólreiðastíg í Fossvogi milli Kringlumýrarbrautar og Reykjanesbrautar samhliða núverandi göngustíg.

Einnig má nefna sem dæmi að öll hverfi fá eigið náttúrusvæði til útikennslu og umhverfisfræðslu. Að búa til sælureit nefnist aðgerð sem felst í samstarfsverkefni milli borgar og íbúa um að skapa og annast sælureiti í hverfum borgarinnar. Áfram verður unnið að betri loftgæðum í borginni og verður meðal annars loftlags- og loftgæðastefna fyrir Reykjavík samþykkt, eftir því sem fram kemur í upplýsingu frá borginni.