Birkir J. taldi sig niðurlægðan

Önnur umræða um Icesave-málið, sem framhaldið var á þingi í gær, gekk treglega. Réði óánægja stjórnarandstæðinga með fjarveru stjórnarliða mestu um en lengst af voru stjórnarandstæðingar einir í þingsalnum. Margsinnis voru gerðar athugasemdir við fjarveruna, lagt til að þingfundi yrði frestað og önnur mál tekin á dagskrá.

Mest var óánægjan með fjarveru formanns og varaformanns fjárlaganefndar, Guðbjarts Hannessonar og Björns Vals Gíslasonar.

„Þeir bera meginábyrgð á flutningi málsins,“ segir Birkir Jón Jónsson, varaformaður Framsóknarflokksins, í samtali við Fréttablaðið. Hann sagði í ræðu á þingi í gær að sér væri misboðið, brotið væri á rétti hans og fjarvera tvímenninganna væri niðurlægjandi fyrir hann.

„Samkvæmt þingsköpum ber mönnum að sækja þingfundi. Þegar rædd eru mál af þessari stærðargráðu ber ábyrgðarmönnum þess skýlaus skylda til að vera við umræðuna,“ segir Birkir Jón sem hneykslaðist jafnframt á forseta að gera ekki hlé á umræðunni þar til tvímenningarnir kæmu í hús.

„Niðurlægingin felst í því að ég hef lagt á mig vinnu við að setja mig inn í málið, samið ræðu með spurningum til ábyrgðarmanna þess og allt er þetta til lítils þegar þeir eru ekki á staðnum. Í því felst niðurlæging,“ sagði Birkir. Guðbjartur og Björn Valur voru á fundi starfshóps um endurskoðun fiskveiðistjórnunarkerfisins.- bþs