Spyr Össur og Steingrím um fundargerðir

Ragnheiður Elín Árnadóttir, þingmaður Sjálfstæðisflokksins, vill vita hvort að til séu fundargerðir forystumanna ríkisstjórnarinnar með erlendum leiðtogum vegna Icesave málsins. Séu slíkar fundargerði til spyr hún jafnframt hvort þær verði birtar. Ragnheiður hefur lagt fram tvær fyrirspurnir Alþingi vegna þessa.

Í fyrirspurn sinni til Steingríms J. Sigfússonar, fjármálaráðherra, spyr Ragnheiður hvort fleiri fundargerðir eða frásagnir séu til af fundum samninganefnda Íslands með breskum og hollenskum viðsemjendum um Icesave frá því eftir að Alþingi samþykkti lög um ríkisábyrgð 28. ágúst. Ef ekki hafi verið gerðar fundargerðir vill hún vita hvers vegna. Þá spyr Ragnheiður hvort einhverjar fundargerðir liggi fyrir fundargerðir af fundum Steingríms með erlendum aðilum, meðal annars á fundi Alþjóðagjaldeyrissjóðsins í Istanbúl í haust.

Ragnheiður spyr Össur Skarphéðinsson, utanríkisráðherra, hvort að til séu fundargerðir af 20 til 60 mínútna löngum fundum Össurar við þrjá þjóðhöfðingja og 12 til 14 utanríkisráðherra Evrópusambandsríkja frá september til október. Þá vill hún vita hvort að til sé fundargerð af fundi Össurar með Dominique Strauss-Kahn, framkvæmdastjóra Alþjóðagjaldeyrissjóðsins, í september. Ef svo er, spyr hún hvort til standi að birta fundargerðina.