Vel mætt í Þvottalaugagönguna

Fjöldi borgarbúa tók þátt í Þvottalaugagöngunni LAUGA VEGURINN 2009 - gengið á vit sögunnar sem Listahátíð í Reykjavík og listamannahúsið START ART stóðu fyrir í dag. Um var að ræða glæsilegan gjörning tileinkaður þeim konum sem þvoðu þvott í gömlu þvottalaugunum í Laugardal. Safnast var saman við útitaflið í Lækjargötu þar sem nemar í Listaháskóla Íslands, uppáklæddir eins og þvottakonur klæddust fyrr á öldum, brugðu á leik með þvottahrúgu og harmonikkusveitin Vaskar Konur spiluðu harmonikkulög.

Þetta kemur fram í frétt á vef Reykjavíkurborgar. Þar segir ennfremur:

Við upphaf göngunnar var þvotturinn svo bundinn saman og búinn til langur taumur sem göngufólkið gekk með upp Laugaveginn. Gangan liðaðist svo inn í Laugardal og var endað við gömlu Þvottalaugarnar. Fjöldi fólks á öllum aldri tók þátt í göngunni í blíðskaparveðri þar á meðal Hanna Birna Kristjánsdóttir borgarstjóri. Má með sanni segja að gangan hafi sett svip sinn á miðborgina því á leiðinni inn í Laugardal voru uppákomur með jöfnu millibili t.d. kórsöngur, hárþvottur, gangandi þvottavélar, tónlistarmenn og Skúringakona heimsins tók til hendinni. Auk þess vörðuðu verk eftir 36 myndlistarmenn veginn. Í Laugardal flutti svo Nýlókórinn gjörning ásamt Weird Girls og þvottaglöðum Reykvíkingum o.fl.